Еркін күрестен еске алу турнирі өткізілді

"Балалар жылы" аясында 2022 жылдың 3 - 4 мамыр күндері жетісулық ақын-палуан, ҚР білім беру ісінің үздігі, ҚР Жазушылар және Журналистер одағының мүшесі, «Еңбек ардагері» медалінің иегері Жұмабек Қуанышбайұлын еске алуға арналған еркін күрестен 2008-2010 ж.т. жасөспірімдер арасында республикалық турнир өткізілді. Ж.Қуанышбайұлы еңбек жолын спорт пен білім беру саласында Ақсу ауданынан бастап, кейінгі жылдары Талдықорған қаласындағы Б.Жолбарысұлы атындағы №18 орта мектеп-лицейінде оқытушы болып, жас ұрпақты спортқа, салауатты өмір салтын насихаттауға, Отаншылдыққа тәрбиелеу шараларына белсене араласты. Турнирдің шымылдығын Алматы облысының дене шынықтыру және спорт басқармасының басшысы, грек-рим күресінен Бежін Олимпиадасының күміс медаль иегері Нұрбақыт Теңізбаев өзі ашып, қатысушыларға сәттілік тіледі. Жарыс өте жоғары денгейде өтті, алыс-жақын аймақтардан 250-ге жуық жас палуандар бақтарын сынады. Жеңімпаздар мен жүлдегерлер медальдар мен бағалы сыйлықтарға ие болды. Осы шараны ұйымдастыруда өзіндік үлестерін қосқан азаматтарымызға ерекше рақметімізді айтамыз. Спортты бірге дамытып, ұрпағымызға үлгі болайық!